7
МАКЕДОНСКА ВЕЧЕР 2026 – РИКАЛДОНЕ
Не беше само уште една Македонска вечер. Ова беше настан што ќе остане запишан во историјата!
Од година во година ги рушиме сопствените рекорди, а оваа година поставивме нов – повеќе од 2.000 посетители! Тоа е најголемата награда за нашиот труд и доказ дека македонското срце чука силно, без разлика каде живееме.
Рикалдоне беше исполнет со македонска песна, ора, насмеани лица и прекрасна атмосфера. Музиката одекнуваше до доцна во ноќта, а заедништвото и позитивната енергија се чувствуваа на секој чекор. Ова беше вечер што ги обедини Македонците и нашите италијански пријатели во едно големо семејство.
Посебна чест ни беше што, покрај успешното одржување на Конзуларните денови, на настанот присуствуваа високи делегации од Македонија и Италија, како и истакнати претставници на италијанските институции и министри, кои со своето присуство ја збогатија оваа свеченост и ѝ дадоа дополнително достоинство.
Од срце благодариме на Генералниот конзулат на Република Северна Македонија во Местре – Венеција, на Фросина Ременски, на градоначалничката на Општина Македонска Каменица Сонја Стаменкова, на градоначалникот на Општина Делчево Иван Гоцевски, на КУД „Вера Јоциќ“, на КУД „Камен Мост“ од Канели, на сите музичари, волонтери, спонзори и пријатели кои дадоа дел од себе за оваа вечер да биде организирана беспрекорно.
Благодарност и до сите медиуми кои ја пренесоа оваа прекрасна приказна и покажаа дека Македонската вечер во Рикалдоне станува препознатлив настан што ги поврзува луѓето, културите и традициите.
Но, најголемата благодарност е до сите вас. Без вас немаше да има 2.000 насмевки, илјадници аплаузи и толку многу прекрасни спомени.
Да продолжиме да ја чуваме македонската традиција, јазик, песна и култура. Да им покажеме на идните генерации дека корените не се забораваат, туку се негуваат со љубов, гордост и заедништво.
Следната година – уште поголеми, уште посилни и повторно со нов рекорд!
Ви благодариме од срце! До нова средба во Рикалдоне!
