15
Од денеска, па во наредните пет дена, Берово е домаќин на Музичко-етнолошкиот камп наменет за децата на иселениците.
На кампот учествуваат 45 ученици од Германија, Хрватска, Малта, Турција, Словенија, Србија, Шведска и Обединетото Кралство, кои преку богата програма ќе се запознаат со македонската изворна музика, традиционалните инструменти и фолклор. Програмата опфаќа екскурзии, посета на манастири, занаетчиски работилници за стари занаети, планинарење и забава со македонска забавна музика.
На свеченото отворање, градоначалникот на Општина Берово, Петар Ружински, директорот на Агенцијата за иселеништво, Горан Ангелов и програмскиот менаџер на кампот, Дина Муцунска, им посакаа топло добредојде на учениците и успешен престој.
Тие истакнаа дека ваквите кампови имаат големо значење за зачувување на македонскиот јазик, традиција и културен идентитет кај младите иселеници.
