Денес во Охрид во Хотел Конгресен центар пристигнаа играорците од шест иселенички фолклорни друштва кои ќе учествуваат на Иселеничкиот фолклорен фестивал во организација на Агенцијата за иселеништво, со концерти во Охрид и Струга. Директорот на Агенцијата за иселеништво, Слободан Близнаковски, во поздравното обраќање им посака срдечно добредојде, им заблагодари за интересот за учество на Фестивалот и истакна дека негувањето на фолклорот во иселеништво е од непроценливо значење за чувањето на македонската традиција и култура и нивно пренесување на идните генерации.
Во знак благодарност за досегашната соработка, директорот Близнаковски на иселеничките фолклорни друштва им врачи благодарници и им подари икони за нивните седишта.
Оваа година на Иселеничкиот фолклорен фестивал ќе учествуваат:
КУД „Македонка” од Виена, Австрија, МКД „Св.Кирил и Методиј” од Крањ, Словенија, МКД „Охридски бисери” од Нова Горица, Словенија, Ансамбл „Сонце” од Крајова, Романија, МКД „Браќа Миладиновци „Осиек, Хрватска, и КУД „Разиграна Македонка” од Квинбијан, Австралија.
