Во рамките на воспоставената соработка меѓу Агенцијата за иселеништво и дигиталната културна и издавачка платформа Panoptikum.mk, ве покануваме да се вклучите во иницијативата за претставување, промоција и дигитално зачувување на книжевното творештво и активностите на Македонците што живеат и работат надвор од Македонија.
Целта е книгите, авторите и културните активности од иселеништвото да добијат свое место во дигиталниот простор, да бидат достапни за читателите во Македонија и низ светот и да останат дел од заедничката културна меморија.
Книги од иселеништвото во е-Библиотека Паноптикум
Ги покануваме писателите, поетите, истражувачите, публицистите и другите автори од иселеништвото да ги претстават своите досега објавени дела.
Преку е-Библиотека Паноптикум овозможуваме дигитално претставување и организирано чување на книги, монографии, зборници, историски и други публикации. За постојните изданија може да се договори бесплатно вклучување во почетната колекција, а за авторите што сакаат да ги продаваат своите електронски книги достапно е и нашето КЛИК е-издаваштво.
Секое дело се вклучува со согласност на авторот или носителот на издавачките права и со претходно договорени услови за читање и дистрибуција.
Издадете нова електронска книга преку КЛИК е-издаваштво
За авторите што имаат подготвен ракопис или планираат ново дело, КЛИК е-издаваштво нуди професионална подготовка и објавување електронски книги.
Во зависност од избраниот издавачки модел, услугата опфаќа уредничка и техничка подготовка, дизајн на корица, потребна издавачка документација, авторска и продажна страница, промоција и онлајн продажба преку Panoptikum.mk.
Читателите можат да ги купуваат изданијата и да пристапуваат до нив преку заштитениот систем за читање на е-Библиотека Паноптикум. Авторите ги задржуваат своите права согласно со индивидуалниот издавачки договор и добиваат договорен дел од реализираната продажба.
За заинтересираните автори обезбедуваме ценовник со различни модели за ново издание, авторско издание или дистрибуција на веќе објавена книга.
Испратете ни вести и приказни од вашата заедница
Panoptikum.mk отвора простор и за редовно претставување на животот и работата на македонските иселеници.
Сакаме да известуваме за активностите на македонските здруженија, клубови и културни организации, нивните манифестации, литературни вечери, изложби, концерти, образовни програми и други иницијативи.
Посебно нè интересираат приказните за иселениците што постигнале значајни резултати во науката, образованието, медицината, уметноста, книжевноста, претприемништвото, спортот и другите професии. Луѓе чии дела и искуства заслужуваат да бидат претставени пред македонската јавност.
Здруженијата можат да ни испраќаат најави, информации, фотографии, биографии и предлози за интервјуа и авторски претставувања. Доставените материјали ќе бидат разгледувани и уреднички обработувани за објавување на Panoptikum.mk.
Како да се вклучите?
За почеток, доволно е да ни испратите кратка порака во која ќе наведете дали сте заинтересирани за објавување постојна книга, издавање ново дело или медиумско претставување на вашите активности.
Авторите можат да достават наслов на книгата, краток опис и информации за постојното издание. Здруженијата можат да испратат кратко претставување на организацијата и пример за активностите што сакаат да ги споделуваат.
Контакт:
Горан Димитровски
Panoptikum.mk / КЛИК е-издаваштво / е-Библиотека Паноптикум
Е-пошта: goran@panoptikum.mk
Телефон: +389 78 246 801
Ги охрабруваме здруженијата да го споделат овој повик со своите членови, авторите и другите заинтересирани Македонци во средините во кои дејствуваат.
Веруваме дека во иселеништвото постојат многу книги што заслужуваат нови читатели и многу човечки приказни што заслужуваат да бидат раскажани.
Со почит,
КЛИК е-издаваштво
е-Библиотека Паноптикум
