19
Наставничката по македонски јазик, Снежана Тесовиќ, во Торонто, Канада, престојот во татковината го комплетираше со посетата на Агенцијата за иселеништво, како единствена надлежна институција со која имала непречена соработка и поддршка и кон која чувствувала желба, обврска и потреба да ја посети во знак на благодарност и зацврстување на врската, како и информирање за состојбите на училиштето и заедницата.
На средбата, наставничката Тесовиќ, по потекло од Куманово, информира дека училиштето по македонски јазик во Торонто е во рамки на МПЦО „Св.Климент и Охридски“, во чии простории се одржува наставата еднаш неделно за време на Богослужбата, по што учениците присуствуваат на светата причест и продолжуваат со други секции кои ги нуди Црковната општина, најчесто во фолклорната група – Ансамблот „Македонка“, под водство на Петер Зискос и Вики Велјанов Зискос и во Карате клубот кој го води Кристофер Толевски.
Со еден збор, Црковната општина ги нуди сите можности младите да ги негуваат мајчиниот јазик, верата, фолклорот и традиционалните вредности и да се пренесуваат на идните генерации.
Програмата и часовите, Снежана Тесовиќ ги организира и креира самостојно според своето искуство како наставник за предучилишна возраст во рамки на канадскиот образовен систем.
Покрај комбинираната настава за деца, има организирано и настава за возрасни кои се 3 – 4 генерација на иселеници со македонско потекло и кои сакат да го научат јазикот на своите претци, што претставува голема радост и мотивација за наставничката.
Како поздрав од Црковната општина, наставничката Тесовиќ донесе печатено издание од списанието „Македонија“, како и издадена книга со творби од учениците „Приказни од Торонто“.
Директорот на Агенцијата за иселеништво, Горан Ангелов, се заблагодари за посетата, за исцрпните информации и упати честитки за заложбата на наставничката и целата Црковна општина „Св.Климент Охридски Торонто“, како пример за најорганизирана заедница која оваа година ќе слави 60-годишен јубилеј од основањето.
За потребите на наставата, директорот Ангелов испрати учебници, лектири за најмладите и други едукативни материјали.
