Директорот на Агенцијата за иселеништво, Горан Ангелов, во придружба на раководителот на сектор за одржување и унапрeдување на врските со иселениците, Билјана Костова, работните посети на друштвата во северниот дел на Италија ги заокружија со посета и конструктивна средба во Генералниот Конзулат на Република Северна Македонија во Венеција.
Во пријатна и работна атмосфера делегацијата беше пречекана од страна на Генералниот конзул, г-ѓа Фросина Ременски, со нејзиниот вреден тим кој вложува максимално сила и посветност да ги обслужи граѓаните на Република Северна Македонија кои живеат во Северна Италија, кој дел е во нивна надлежност.
Имено, Генералниот конзул, Фросина Ременски, го информира директорот на Агенцијата за иселеништво, Горан Ангелов, за големиот обем на работа и конзуларните услуги кои ги нуди конзулатот, бидејќи во Северна Италија живеат голем број македонски граѓани. Исто така, поради големата географска оддалченост помеѓу градовите каде живеат и работат нашите иселеници, има потреба од конзуларни денови кои ќе се реализират со претходно утврдени термини, барања и конзуларни потреби. Генералниот конзул, Ременски, информира дека прават напори со тимот да присуствуваат на настани организирани од страна на македонските културни друштва или црковни општини, доколку им дозволува конзуларниот обем на работа во седиштето.
Воедно, информира и дека Генералниот конзулат бил директно вклучен по насоки од Министерството за надворешни работи и надворешна трговија во пречекот на лицата кои беа повредени во трагедијата во Кочани и нивните родители, испратeни во неколку градови во Милано, Пиза и Парма за нивно долекување.
Во таа насока, Генералниот конзул, Ременски, се заблагодари за пожртвуваноста од страна на поединци, претставници на иселенички организации кои несебично и организирано излегле во пресрет за сите потреби.
Директорот Ангелов и Генералниот конзул Ременски ја отворија темата околу создавањето на „Унија на македонски асоцијации“ во Италија и обострано се согласија дека ќе се заложат да го поддржат создавањето на тоа тело, секој од аспект на својата надлежност.
Раководителот на сектор за унапредување и одржување на врските од Агенцијата за иселеништво, Билјана Костова, информира за потребата од билатерален договор помеѓу образовните институции на Република Италија и Република Северна Македонија, за формирање на настава по македонски јазик во Северниот дел на Италија, поддржана од страна на Министерството за образование и наука на Република Северна Македонија и да се испратат наставници по македонски јазик, по примерот на другите европски држави.
Генералниот Конзул Ременски покажа интерес за реализација на наставата по македонски јазик во тој дел на Италија, истакнувајќи ја важноста на учењето на македонскиот јазик и чувањето на идентитетот на иселениците во странство, со што и двете страни се согласија дека согласно со насоките од страна на Министерството за образование и наука ќе се вклучат активно во процесот на реализација.
На средбата, исто така, стана збор за проблемот со возачките дозволи кој треба да се реши веднаш по корекцијата на новото име на Република Северна Македонија во италијанскиот систем, како и за потребата од возобновување на авио-линијата Тревизо – Охрид.
Директорот Ангелов се заблагодари за срдечниот прием во Конзулатот. И двете страни се согласија дека во секоја држава каде има голем број на македонски граѓани потребно е доекипирање на ДКП-ата поради големиот обем на работа и конзуларни потреби.
Генералниот Конзул Ременски се заблагодари за посетата и ја истакна важноста на ваквите средби помеѓу институциите надлежни за иселениците во странство, за да се унапреди врската со нив и да се одговори на нивните потреби и барања.
