По успешните донации во Скопје и Битола, Обединетата македонска дијаспора (ОМД) во партнерство со World Medical Relief од Мичиген ја реализираше новата значајна донација за Болницата во Кавадарци, вредна 447.600 американски долари. Повеќе од шест тони медицинска опрема, болнички кревети, респираторни системи, кислородни маски, хируршки инструменти, ортопедски помагала и инвалидски колички, ќе придонесат за подобрување на здравствената грижа за најранливите граѓани. Опремата ја донираше World Medical Relief, а трошоците за транспорт ги покрија ОМД и иселениците од Кавадарци.
„Овие донации се порака на солидарност и одговорност. Горди сме што ова станува традиција“, изјави Арги Беллио, претседавач на Бордот на ОМД.
Директорот на World Medical Relief, д-р Џорџ Самсон, додаде дека нивната мисија е да помагаат таму каде што е најпотребно, а Александар Бежановски, амбасадор на организацијата за Македонија, нагласи дека здравствената грижа не смее да зависи од локација.
Донацијата беше реализирана со посветеност на Мишко Јосифов, иселеник од Кавадарци, кој ја предводеше акцијата за собирање средства.
Заменик-министерот за здравство, Јовица Андовски, и директорката на болницата, д-р Гордана Ѓорчева, ја поздравија донацијата како значаен придонес за локалниот здравствен систем.
Од 2004 година, ОМД има обезбедено над 3 милиони долари хуманитарна помош за Македонија, со што се зајакнува врската меѓу татковината и дијаспората.
