Драги пријатели,
Почитувани сограѓани,
Денес зборувам пред луѓе кои носат посебна тежина во ова општество. Луѓе кои ја знаат татковината и одвнатре и однадвор. Луѓе кои заминале, не затоа што сакале да ја напуштат татковината, туку затоа што животот, времето и околностите ги натерале да бараат подобри услови, сигурност и перспектива. И најважно – луѓе кои се вратиле и тука започнале нова, успешна приказна.
Вашето враќање не е симболично. Тоа е суштинско. Тоа е порака дека Македонија не е заборавена, дека корените не се пресечени и дека љубовта кон домот не исчезнува, без разлика на годините и далечината.
Сакам јасно и искрено да кажам:
Ние не можеме да се лутиме на оние кои заминале.
Ги разбираме.
Ја разбираме нивната мака, нивната борба, нивните тешки одлуки.
Знаеме дека многумина заминаа, затоа што немаа избор. Затоа што сакаа подобро образование за своите деца, посигурна работа, достоинствена плата, стабилен живот. И тоа е нормална човечка потреба. Тоа е борба за иднина.
Но исто така знаеме и нешто друго.
Дека колку и да оди човек далеку, срцето секогаш го влече назад.
Затоа што, како што мудро вели нашиот народ – каменот тежи на своето место.
Каде и да одите низ светот, колку и да сте успешни, таму секогаш ќе бидете дојденци.
Почитувани пријатели, ценети, можеби и добро платени – но дојденци. Само дома си свој. Само дома твоето име, твојот труд и твојата приказна имаат длабок корен и трајна вредност.
Вие што денес сте тука сте жив доказ за тоа. Вие покажавте дека знаењето и искуството стекнато надвор не се губат кога ќе се вратите, туку добиваат смисла. Стануваат темел за нови бизниси, нови работни места, нови идеи и нова енергија во нашата економија.
Земјата денес не е земја што стои во место. Македонија се менува и се развива.
Економијата расте. Се инвестира во индустрија, во енергетика, во инфраструктура. Се градат патишта, фабрики, капацитети што носат додадена вредност. Се отвора простор за претприемништво, за иновации, за младите и за оние што сакаат да вложат и да создаваат дома.
Повеќе информации на следниот ЛИНК
