Со цел да им се овозможи на учениците што изучуваат македонски јазик во Хрватска поефикасно и подлабоко да се поврзат со својот мајчин јазик, тимот предводен од Ели Маказлиева и Марија Богатиновска го создаде новиот учебник „Учиме македонски јазик“.
Идејата за оваа книга се родила во ноември 2023 година, за време на посетата на училиштата во Загреб, каде што иницијаторката Деспина Белчовска Велинска, заедно со наставниците и учениците, го препознала потребата од ваков материјал. По нејзин предлог, таа ја напишала и воведната содржина, како и изборот на текстовите, поставувајќи ги темелите за она што денес е вистинска читанка за младите македонски ученици.
„Се крчкаше, осмислуваше, пишуваше и една година подоцна ја видовме реализацијата – финалниот дел од приказната“, вели Маказлиева.
Учебникот е создаден според програмата одобрена од Министерството за образование на Хрватска и содржи разновидни текстови – поезија и проза, илустрации што го следат текстот, прашања, вежби и упатства. Освен што го развива познавањето на македонскиот јазик, книгата има и поширока образовна цел – поттикнување на критичкото размислување, решавање проблеми и креативност кај учениците.
„Оваа цврста основа ќе создаде внатрешна мотивација, што ќе ја поттикнува нивната желба за учење, водејќи ги напред кон нивното образовно патување“, додава Маказлиева.
Таа нагласува дека учебникот е многу повеќе од само наставен материјал – тој е алатка што им помага на децата да го зајакнат својот потенцијал, да ја разберат културата и обичаите и да ја одржат врската со своето наследство.
„Кога детето учи на својот јазик, светот се отвора. Поимите се трансформираат од апстрактни во реални искуства, се пали искрата на разбирање и се раѓа чувството – ,Јас можам!‘“, заклучува Маказлиева.
Со оваа книга, македонските ученици во Хрватска добиваат можност не само да го научат јазикот туку и да го доживеат како дел од својот идентитет, што е клучно за нивниот личен и културен развој.
Повеќе слушнете овде: Facebook
