Jusuf Jusufi, sfidat e një shqiptari nga Maqedonia në Gjermani

0
26

I lindur në Zhelinë të Tetovës më vitin 1965 dhe i diplomuar në Fakultetin e Pedagogjisë, Jusufi do të merrte në vitet 90′ rrugën për në Gjermani sikurse mijëra shqiptarë të tjerë nga Maqedonia. Ajo ditë kur ai i ktheu krahët vendlindjes së tij, por veçanërisht prindërve do ti kujtohet edhe sot pas gati 30 vitesh. “Ishte një ditë marsi, mesi i viteve të nëntëdhjeta, kur unë mora valixhen dhe u nisa drejt një rrugë deri atëherë të panjohur për mua. Nuk do t‘i harojë për jetë lotët e prindërve të mi që më përcollën atë të shtune me mjegull e lagështi“, kujton Jusufi.

Si të gjithë emigrantët e tjerë, edhe ai do të kishte një fillim jashtzakonisht të vështirë. Përveç një miku, nuk njihtë askënd tjetër. Gjuha që nuk kuptonte i paraqiste vështirësi të jashtzakonshme. Nga nji arsimtar apo drejtor shkolle ku kishte punuar dikur në Maqedoni, iu desh të fillonte punë në ndërtimtari. Kjo e bënte edhe më të vështirë këtë fillimjete në Gjermani. Punonte shumë mbi dhjetë orë në ditë, pasi nuk kishte rrugëdalje tjetër për të mbijetuar.

Paralelisht ai duhej edhe të integrohej me jetën këtu, si një kusht për të jetuar në këtë vend. Më pas iu bashkangjit edhe gruaja dhe dy djemtë. Pavarësisht vështirësive, Jusufi nuk mund të qëndronte indiferent në aspektin social dhe shoqëror. Ai nisi të kontaktonte me shqiptarët e tjerë të cilët kishin shumë vite që jetonin këtu. Numri i tyre sa vinte e shtohej dhe natyrshëm lindte nevoja e një organizimi apo pikëtakimi të paktën njëherë në javë si një mundësi për të shkëmbyer eksperienca dhe për tu çmallur me vendlindjet e tyre. Madje, sipas Jusufit, vitet e fundit numri i shqiptarëve të ardhur në Gjermani është rritur në mënyrë rapide. Madje ai sot është i zgjedhur si Kryetar i Bashkësisë Shqiptare në Gjermani, organizatë kjo që në vetvehte ngërthen shoqatat që veprojnë këtu në këtë Republikë (NRW) por që mjerisht numri i shoqatave të reja është shumë i vogël. “Është e vërtetë po ashtu që ata janë sot më të arsimuar dhe kualifikikuar por mendimi im personal është se organizimi është më i ulët, në krahasim përshembull me dhjetëvjetshin e kaluar. Ky kontigjent i ri i që ka ardhur në Gjermani prej vitit 2015, solli me vehte nji mosdisponim organizimi apo angazhimi lidhur me prezantimin e kulturës sonë kombëtare, me argumentin se “vendet tona janë vende pa perspektivë, me korrupsion të larë dhe të pasigurta për të jetuar. Natyrisht ka përjashtime dhe raste për t‘i përshëndetur ata shqiptarë të ardhur në Gjermani me të cilët duhet të mburremi“, thekson Jusufi. Vetë Jusuf Jusufi me inciativën e tij dhe disa shqiptarëve atdhedashës në rrethinën ku jetojnë e punojnë patën themeluar në vitin 2013 Shoqatën shqiptaro-gjermane në Mynsterland me seli në qatetin e Mynsterit ku edhe u zgjidh Kryetar i kësaj shoqate për pesë vite.

“Ne kishim si qëllim që sipas mundësive tonë “të mbillnim diçka shqiptare në tokën gjermane“. Përshtypjet tona janë se këtë qëllim e kemi realizuar në përgjithësi. Shpesh ata justifikohen me fjalët: Ç‘kemi ne prej shoqatës, ç‘të mira na sjell shoqata!?.. Ndaj i bëj thirrje që edhe këta pjesëtarë të trungut tonë të përbashkët, të bëhen pjesë përbërse aktiviteteve tona“; thotë për gazetën tonë, Jusuf Jusufi. Shoqata shqiptaro-gjermane në Mynster tashmë ka një përvojë të gjatë me aktivitete nga më të ndryshmet edhe në sajë të formimit të disa grupeve si: Forumi i gruas, Grupi i sporteve, Grupi i çështjeve humanitare, Grupi i valltarëve dhe letrar, Grupi i aktorëve. Ky i fundit, me nji angazhim dyvjeçar, ariti që më 22 mars 2019 në Mynster të vërë në skenë para artdashësve shqiptarë dhe gjermane, premierën e dramës “Besa e Madhe“ të autorit Mirosh Markaj, nën regjinë e Jusufit. Edhe pse të gjithë aktorët ishin amatorë, drama, e cila zgjati gati 2 orë dhe ishte e para e këtij lloji në mesin e shqiptarëve në Gjermani, pati shumë sukses. Ndërkohë shqiptari nga Maqedonia, Jusuf Jusufi ka rezerva lidhur me vlerësimin dhe bashkëpunimin mes Diasporës shqiptare dhe institucioneve në vendet amë.

„Mendoj se Diapora edhe më tutje vazhdon të shikohet më shumë si burim i të ardhurave materiale, se sa si vlerë kombëtare. Na mungojnë informacionet e vërteta, bindëse në një kohë kur mediat janë shtuar shumë, por kemi terr informimi ose thënë ndryshe kakafoni informative.

Është e vërtetë se egzistojnë edhe organizata si Germin e të tjera, që mundohen të ndërtojnë ura komunikimi. Por votimet në diasporë ende nuk po realizohen dhe neve këtu na mungon sovraniteti i plotë për të qenë pjesë në zgjedhjet parlamentare“, thekson Jusufi. Me shpresë se gjithë kjo katrahurë do të marrë fund, Jusuf Jusufi uron në fund për gazetën tonë që: “Potenciali i ri i shqiptarëve në Gjermani, i shkolluar dhe i integruar duhet të marrë fatin në duart e tyre, të hapi horizonte të reja bashkëpunimi duke kontribuar që modelin e këtij vendi ta përcjellë në vendlindjet tona që shqiptarët të kenë dinjitetin e duhur për të punuar e jetuar“.