Семејството на малиот Јаков собра 50.000 долари за негово лекување во Турција

0
175

Семејството на двегодишниот Јаков успеа да собере половина од средствата потребни за негово лекување во Турција. Тие заедно со австралискиот бизнисмен Џим Ристевски, успеаа да соберат околу 50.000 долари од потребните 100.000.

Јаков со родителите веќе е сместен во болницата во Турција каде ќе му биде направена хемотерапија. Бизнисменот од Австралија, кој има македонско потекло претходно успеа да собере пари преку неговата мрежа на деловни партнери и пријатели и да уплати околу 28.000 австралиски долари.

„Овој пат, парите ги собравме за една недела, со навистина лесен напор. Сторијата ги стопи срцата на луѓето. Најголемиот дел од средствата ги собрав од семејството, пријателите и бизнис партнерите во Австралија. Секогаш лично донирам голем дел. Сакам да се заблагодарам на сите македонско-австралиски фан страни на социјалната мрежа ФБ, за нивното ангажирање веста да допре преку оваа платформа до многу луѓе. Голема благодарност до македонските медиуми, кои кај вас ја раширија веста за акцијата. И благодарност до сите добри луѓе кои ги отворија и срцата и џебовите за да успееме”, рече Ристевски.
Познатиот бизнисмен и филантроп по трет пат со своја иницијатива успеа да ја вклучи заедницата во Австралија за помош.
Во 2016 година, кога се случија големите поплави тој успеа да собере 10.000 австралиски долари за малиот Ведран Велиновски од Крива Паланка, кој ги загуби своите мајка и брат на скопската обиколница.
Лани повторно се јави како организатор на иницијатива за собирање донации во која ја вклучи неговата ќерка Медисон Ристевски, средношколка од Волонгонг, Австралија.

Таа ѝ припаѓа на четврта генерација Австралијци со македонско потекло и изработувајќи средношколски проект, ги заинтригира светот и дијаспората.
Донациите доаѓаа од хумани луѓе од Австралија, Кина, Филипините, Нов Зеланд, Малта, Канада, САД. А беа наменети за реконструкција на Медицинското училиште Д-р Јован Калаузи од Битола, кое беше во очајна состојба.